सेप्टेम्वर ११
अमेरिकी राष्ट्रपति बाराक ओबामाले सिरियामाथि कारवाहीका लागि घरेलु तथा बाह्य समर्थन जुटाउने प्रयास जारी राखेका छन् । सिरियाले अगष्ट २१ मा रासायनिक हतियार प्रयोग गरी एक हजार चार सय भन्दा बढी नागरिकको हत्या गरेको भन्दै अमेरिकाले त्यहाँको रासायनिक हतियार नष्ट गर्न राष्ट्रिय र अन्तर्राष्ट्रिय समर्थन जुटाउने प्रयास गर्दै आएको छ । यसैक्रममा मंगलवार साँझ राष्ट्रका नाममा सम्वोधन गर्दै ओबामाले सिमित सैन्य कारवाहीलाई समर्थन गरिदिन कंग्रेस र सम्पूर्ण नागरिकहरुलाई आग्रह गरे ।
यस्तो सिमित सैन्य कारवाही रासायनिक हतियार नष्ट गर्न मात्र केन्द्रीत हुने र सिरियाको भूमिमा आफ्ना सेना नपठाउने सेनाका प्रमुख समेत रहेका राष्ट्रपति ओबामाले प्रष्ट पारे । १५ मिनेट लामो टेलिभिजन सम्वोधनका क्रममा ओबामाले सिरियाको सहयोगी रुससंग पनि कुटनीतिक वार्ता जारी रहेको भन्दै आफुले विदेशमन्त्री जोन केरीलाई बिहीवार उनका समकक्षीसंग वार्ता गर्न रुस पठाउन लागेको र आफु पनि रुसी राष्ट्रपति पुटिनसंग वार्तामा रहेको बताए । हामी अहिले युरोप,एशिया,मध्यपूर्वसहित बाँकी विश्वको सिरियाविरुद्ध समर्थन जुटाउन लागिपरेका छौं,सिरियामा रासायनिक हतियार प्रयोग गरेर मान्छे मार्ने काम भएको प्रमाण हामीसंग छ जुन अन्तर्राष्ट्रिय कानुन र मानवअधिकार विपरित छ ।
त्यसैले बशर अल-असदले त्यहाँका सबै रासायनिक हतियार अन्तर्राष्ट्रिय समुदाय समक्ष बुझाउनुपर्छ नत्र हामी चुप लाग्ने छैनौं'चेतावनीको शैलीमा ओबामाले भने । उनले सिरियामाथिको सिमित सैन्य कारवाहीका लागि कुटनीतिक र राजनीतिक पहल सफल नभएमा आफ्ना सेनालाई तयारी अवस्थामा रहन पनि निर्देशन दिए । सिरियामाथिको सैन्य हस्तक्षेप अमेरिकी सुरक्षा हितका साथै आतंकबाद उन्मुलनको कदम हुने भन्दै ओबामाले सिरियामाथि सैन्य हस्तक्षेप नगरेमा बिश्वभर बिनाशकारी हतियारको प्रयोग बढ्ने दाबी समेत गरे ।
सिमित सैन्य कारवाही असद सरकारलाई संदेश दिन प्रशस्त हुने भन्दै ओबामाले यस्तो कारवाही अमेरिकी सुरक्षा हितका लागि पनि आवश्यक रहेको जिकिर गरे । राष्ट्रसंघ सुरक्षा परिषदका स्थायी सदस्य राष्ट्रहरु अमेरिका,फ्रान्स र बेलायत सिरियाले आफ्नो रासायनिक हतियार विश्व समुदायसमक्ष नबुझाए सिरियाका विरुद्ध बल प्रयोग गर्ने प्रस्ताव तयार गर्दै छन् भने रुस चाहिं बल प्रयोग गर्ने प्रस्तावको विरोध गरिरहेको छ । दुई वर्ष अघिदेखिको द्वन्दमा सिरियामा हालसम्म एक लाखभन्दा बढी व्यक्ति मारिईसकेका छन् ।एजेन्सी,
