पाँच मुक्तकहरु....
१) मुक्तक :-
कहिलेकहीँ जुनेली भै आए हुन्थ्यो सपनीमा
ढकमक्क चमेली भै आए हुन्थ्यो सपनीमा
विपनामा भेट्ने आशा छैन अब जिन्दगीको
माया गर्ने सहेली भै आए हुन्थ्यो सपनीमा !!
२) मुक्तक :-
प्रतीक्षामा बस्दा बस्दै उमेर ढल्किन्छ कि
के भरोषा जिन्दगीको कालै पल्किन्छ कि
डरै लाग्यो चारै तिर अँध्यारोले ढाक्दा
कुर्छु अझै झलमल्ल चाँद टल्किन्छ कि !!
३) मुक्तक:-
जिन्दगी हो बगी जाने,कर्कलाको पानी
छोडौँ आजै वैमनस्य,छोडौँ खिचातानी
एक न एक दिन हामी सबै,लाग्नु पर्छ बाटो
न त चल्छ भनसुन त्यँहा,न त आनाकानी !!
४) मुक्तक :-
चाड पर्व आउँछन् जान्छन्,आँसु झर्छ परदेशीको
विरहले छाती भित्रै,गाँठो पर्छ परदेशीको
मुटु सधैँ पुगेको छ आफ्नै पाखा पखेरामा
प्रवासमा बस्नु पर्दा मनै मर्छ परदेशीको !!
५) मुक्तक :-
हाँस्दै खेल्दै अघि बढ्ने,चाहा हुन्छ जिन्दगीमा
सुख शान्ति ओझेल पर्दा,डाहा हुन्छ जिन्दगीमा
घाम,पानी,हुरी,बतास,खप्नु पर्छ बारम्बारै ...
आफ्नो दर्द आफैंलाई नै,थाहा हुन्छ जिन्दगीमा !!
कोमल भट्ट
पुरानो नैकाप,काठमाडौँ
हाल :-न्युयोर्क,अमेरिका
