पर्सा साउन २२,
वीरगन्जको नारायणी उपक्षेत्रीय अस्पतालको प्रयोगशालाले एचआइभी सङ्क्रमितका लागि सिडिफोर काउन्ट परीक्षण सेवा बन्द गरेपछि जिल्लामा रहेका सङ्क्रमित मारमा परेका छन् ।
विद्युत् समस्याका कारण पाँच महिनादेखि सेवा बन्द भएपछि सङ्क्रमित काठमाडौं र चितवन लगायतका स्थानमा गई परीक्षण गराउन बाध्य भएका छन् ।
प्रयोगशालामा रहेको एसीलगायतका उपकरण सञ्चालनका लागि आवश्यक रहेको स्टेप्लाइजर नभएकाले सिडिफोर काउन्ट परीक्षण गर्न नसकिएको प्रयोगशाला प्रमुख हरिचन्द भगतले जानकारी दिए ।
करिब रु ९० लाख पर्ने सो उपकरण थन्क्याएर राख्दा बिग्रिने अवस्थामा पुगेको भगतले बताए ।
यस विषयमा नारायणी उपक्षेत्रीय अस्पतालका मेडिकल सुपरिटेन्डेन्ट चिकित्सक रामाशङ्कर ठाकुरसँग कुरा गर्दा उहाँले प्रयोगशालामा रहेको एसी र उपकरण सञ्चालनका लागि आवश्यक स्टेपलाइजर नभएको कारण सेवा बन्द गरिएको र बन्द सेवा सञ्चालनका लागि पहल भइरहेको जानकारी दिए । रासस:
