उपचारको क्रममा दिल्लीमा निधन भएका अभिनेता श्रेष्ठको काठमाडौंमा भावपूर्ण शवयात्रा पछि २६ साउन साँझ अत्येष्टी गरिएको हो ।
पशुपति आर्यघाटमा अत्येष्टी गरिनुअघि काठमाडौंका विभिन्न ठाउँमा शवयात्रा गरिएको थियो । शवयात्रामा उनका शुभेच्छुक, कलाकार/चलचित्रकर्मी, राजनीतिक दलका नेता, सर्वसाधारण लगायतको बाक्लो उपस्थिति थियो ।
उनको शवलाई कमलादीस्थित प्रज्ञा भवनमा अन्तिम श्रद्धाञ्जलीका लागि राखिने तयारी भएपनि भीडका कारण संभव भएको थिएन । कमलादी अगाडि शवसहितको गाडी केहीबेर रोकेर आर्यघाटतर्फ लगिएको थियो ।
नयाँदिल्लीस्थित गंगाराम अस्पतालमा उपचारको क्रममा २४ साउन राति निधन भएका श्रेष्ठको शव एयर इन्डियाको विशेष विमानबाट २६ साउन अपरान्ह काठमाडौं ल्याइएको थियो । उनको सम्मानमा सरकारले राष्ट्रिय झण्डा ओढाउने र सलामी दिएको छ । सरकारले पहिलोपटक कलाकारलाई यस्तो सम्मान दिएको हो । तस्वीरः ऋषिराम कट्टेल, हिमाल खबर :
