 |
| भूकम्पको पीडा: चीनको दक्षिण-पश्चिम क्षेत्र युनानमा आइतबार गएको ६.१ रेक्टर स्केलको भूकम्पका कारण क्षतिग्रस्त सडक तथा घरहरू। यो शक्तिशाली भूकम्पका कारण मंगलबारसम्म करिब ४ सय मानिसको मृत्यु भइसकेको छ। तस्बिर: एएफपी |
चीनको दक्षिण-पश्चिम गाउँमा गएको भूकम्पमा परी मृत्यु हुनेको संख्या मंगलबार ४ सय पुगेको जनाइएको छ। चीनको युनान प्रान्तमा आइतबार ६.१ रेक्टर स्केलको शक्तिशाली भूकम्प गएको थियो।
भूकम्प प्रभावित क्षेत्र पहाडी इलाकामा रहेको हुनाले उद्धारकार्यमा अत्यन्त कठिनाइ परेको जनाइएको छ। मृतकको संख्या ४ सय पुगेको सरकारी स्तरबाट मंगलबार पुष्टि गरिएको छ। यस भूकम्पबाट एक हजार ८ सयभन्दा बढी व्यक्ति घाइते भएका बताइएको छ।
भूकम्पबाट ८० हजार घर ध्वस्त भएका र एक लाख २४ हजार घर क्षतिग्रस्त भएको युनान प्रान्तका प्रवक्ताले जानकारी दिएका छन्। स्थानीय समय अनुसार आइतबार ४:३० बजे अपराह्नमा गएको सो भूकम्पको केन्द्रबिन्दु लुडिआन जिल्लादेखि २३ किलोमिटर दक्षिण-पश्चिम पर्ने लोङ्गटोउसान नगरमा रहेको थियो। सो भूकम्प १२ किलोमिटर गहिराइसम्म गएको पनि समाचारमा उल्लेख छ। (एएफपी)
