भोजपुर जेष्ठ ३१,
समयमा उपचार नपाएपछि भोजपुरको सानोदुङमा गाविसकी एक सुत्केरीको मृत्यु भएको छ । जिल्ला अस्पतालको सिफारिसमा विराटनगरतर्फ लैजाँदा शुक्रबार बिहान बाटैमा मृत्यु भएको हो ।
जिल्लाको सुदुरपूर्व सानोदुङमा गाविस-१ सुप्लाकी १८ वर्षीया सृजना परियारले बच्चा जन्माउन नसकेर ज्यान गुमाएकी हुन् । गाउँबाट अस्पताल ल्याइपुर्याउदा बच्चा पेटमै मरि सकेकोले गम्भिर प्रकृतिको शल्यक्रिया गर्नुपर्ने भएपछि अन्यत्र सिफारिस गरिएको जिल्ला अस्पतालका डा.राजन थापाले बताए ।
एम्बुलेन्सबाट कोशी अञ्चल अस्पताल विराटनगरतर्फ लैजाँदा भोजपुर-लेगुवा सडकको भैंसिपङ्खामा सुत्केरीको मृत्यु भएको हो । मृतकको पति रोशन परियारले शल्यक्रियाको लागि जोखिम सम्झौता पत्रमा हस्ताक्षर नगरेपछि चिकित्सकले समेत जोखिम नलिएको डा.थापाले बताए । आजको कान्तिपुर दैनिकमा खबर छ ।
