कविता, बिम्बहरु ...
उन्मुक्त बयली खेल्ने हावासंगै
बन्द झ्यालको शिसामा ठोकिने
बर्षाको बुँदहरु
कयौ बिम्बहरु कोर्छन र
धुमिल हुन्छ मनको क्यानभास ।
उचेरा गएको मन
पहेंला सिरु फुल्ने आँगन
बर्षा ऋतुको साँझ
विचारका श्रंखलाबद्ध बिषयहरु
उस्तै उकालो ओरालो झर्छन
रेगीस्तानी बगरमा ।
एक अल्लड शोडषी
कविताका केहि पंक्तिमा
निरजका गुलाबी पुष्पदल
कल्पना र कामना बीच
नयाँ रुपमा उभिन्छन ।
एक झोका उही बतासको
उस्तै अमिलो पसिनाको सुगन्ध लिएर
शब्द शब्दमा छरिदा
टर्रो लाग्छ जीवनका अनुभूतीहरु
बर्षादको बुँद बुँदले पखालिन भन्दा पहिला
बन्न खोज्छन नयाँ बिम्बहरू
उही बन्द झ्यालको शिसामा ।
निर्मला खड्गा
इज़रायल
