कार्यक्रम टफ-टक :
समाजसेबी महिला इन्दिरा राना मगर सन २०१४ को बालबालिकाको क्षेत्रमा जुनियर नोवेल पुरस्कार मानिने "वल्ड्स चिल्ड्रेन्स प्राइज"का लागि मनोनयनमा पर्नु भएको छ ।
विगत २४ वर्ष देखि जेलमा रहेका कैदीहरुका बाल बालिकाको हितमा काम गर्दै आउनु भएकी इन्दिरालाई पाकिस्तानकी मलाला युसुफ र माइक्रोसप्mटको काम छाडेर पुस्ताकालयको विकासमा सक्रिय अमेरिकाका जोन उडसँगै, स्वीडेनमा रहेको दी वल्डस चिल्ड्रेन्स प्राइज फाउन्डेसनले अन्तिम तीनको मनोनयमा पारेको हो ।
यस अघि यो पुरस्कार नेलशन मण्डेला, आङ साङ सुकी र देशमण्ड टुटुलाई प्रदान गरिएको थियो ।
संस्था तर्फ भने यो अवार्ड माइती नेपालले पाइसकेको छ ।
इन्दिराले प्रिजनर्स एसिस्टेन्स नेपाल नामक संस्था सन् २००० स्थापना गरेर हजारौं बालबालिकाको उद्धार गरेकै कारण उहां यो मनोनयनमा पर्नुभएको हो । जन्म कैदको सजाय पाएका अभिभावक लामो समय जेलमा रहने र उनीहरुका बालबालिकाको बिचल्ली हुने देखेर यस्तो सेवामूलक कार्य थालेकी इन्दिराको संस्थाबाट सहयोग पाएर हाल विद्यालय जाने विद्यार्थीको सख्ंया ४ सय नाघेको छ । यसका साथै उहांको संस्थाले जेल परेका युवाहरुलाई सीप पनि सिकाउने काम गर्छ ।
सन २००५ मा उहांले अशोका फेलोसिप पाउनु भएको थियो भने २००९ मा न्युयोर्क स्थित एशिया सोसाइटीको एशिया ट्वान्टी वन योङ लिडर पब्लिक सर्भिस अवार्डबाट पनि सम्मानित हुनुभएको थियो । झापाको गरिब परिवारमा जन्मेकी इन्दिराले १० बर्ष सम्म स्कुल समेत जान पाउनु भएन भने एकैपटक पांच कक्षामा भर्ना भएर पढाई सुरु गर्नुभएको थियो । स्नातक सम्मको अध्ययन पुरा गरेकी इन्दिराले आफ्नो जीवनको आधा समय समाजसेवामा विताउनु भएको छ ।
