मनिला कार्तिक २७,
आँधीबाट भारी तहसनहस भएको फिलिपिन्सलाई विश्वका विभिन्न संस्था तथा देशहरूले सहयोग पठाइरहेका छन् । यो ताजा प्रकृति विपत्मा १० हजारभन्दा बढीको ज्यान गइसकेको सरकारले पुष्टि गरेको छ । हजारौं अझै बेपत्ता छन् ।
परिवारजनले हराइरहेकाको हरसम्भव खोजी गरिरहेका छन् ।
अमेरिका, राष्ट्रसंघ र अस्ट्रेलियाले आइतबारदेखि नै आपत्कालीन सहायता पठाउन सुरु गरेको छ । पूर्वी द्वीप लेट तथा समरलाई भूमध्यसागरीय शक्तिशाली आँधी 'सुपर टाइफुन हायान'ले सबभन्दा बढी प्रभावित बनाएको छ ।
घरका पर्खालहरू मात्र देखिएका छन् । आँधीपछि उठेको १५ मिटर अग्लो पानीको छालले पूरा सहरलाई ढाकेको थियो । आँधीले सडक तथा विमानस्थल जस्ता आधारभूत पूर्वाधारलाई जर्जर बनाएको छ । राहत कार्यमा पनि अवरोध उत्पन्न भएको छ ।
झन्डै ९० लाख जनता प्रभावित भएका छन् ।
अधिकांशसँग भोजन, पानी र बास छैन । भोजन र दूधको खोजीमा पसल र मलमा लुटपाट सुरु भएको छ । भोकमरीले धेरैको मृत्यु हुने अनुमान गरिएको छ । सरकारले अति आवश्यक दैनिक उपभोग्य सामग्रीको अभाव भएको स्वीकारेको छ । राहत कार्यको खराब व्यवस्थापनका कारण स्थानीय असन्तुष्ट छन् ।
अस्ट्रेलिया र अमेरिकाले आपत्कालीन सैनिक सहयोग र उद्वारका लागि उद्वारकर्मीहरू परिचालन गरेको छ । आँधीले पुर्याएको क्षतिको आँकलनसँगै उद्वार जारीे छ ।
त्यहाँ सञ्चार अवरुद्ध भएको छ । ऊर्जा तथा टेलिफोन सञ्जाल नष्ट भएका छन् । ती क्षेत्रमा सञ्चार लगायतका विभिन्न आधारभूत सहायताको काम भइरहेकोे छ । क्षतिको पूर्ण विवरण अझै प्राप्त हुन सकिरहेको छैन ।
गति कम भइइसकेको यो आँधी चिनियाँ सीमास्थित उत्तरी भियतनाममा प्रवेश गरेको छ । चीनको दक्षिणी तटीय क्षेत्रमा पनि यस आँधीबाट कम्तीमा ६ को मृत्यु भएको छ । हजारौं घर क्षतिग्रस्त भएका छन् । उक्त क्षेत्रबाट ३० हजारलाई सुरक्षित स्थानमा सारिएको छ । एएफपी :
