एकै छिन नबोल्दा नि लजालु पो भन्थ्यौ अरे
दुई शब्द के बोल्या थें बिषालु पो भन्थ्यौ अरे |
कस्तो होला मान्छे पनि जता गयो उतै धाउने
लुकी छुपी चियाउँदा मायालु पो भन्थ्यौ अरे |
एकान्तमा कसै सँग मस्किएको देखे पछी
को हो भनि जान्न खोज्दा शंकालु पो भन्थ्यौ अरे |
चाड बाड भित्रिदैछन् आउने जाने कति हुन्छन्
चिया पानी सोद्धै जाँदा सिपालु पो भन्थ्यौ अरे |
बानी आफ्नो यस्तै छ है सानै देखि लागेको हो
आँखा झिम्काइ हेरेको त क्या चालु पो भन्थ्यौ अरे |
साबित्रा लुइँटेल घिमिरे
झापा बिर्तामोड
