अन्तर्राष्ट्रिय नेपाली महिला साहित्य सम्मेलनको आव्हान I

अझ हामी अमेरिकाली नेपालीहरुको लागि अनेसासको नेतृत्वमा न्युयोर्कमा सम्पन्न हुने यो महिला साहित्य सम्मेलन एउटा अवसर पनि हो । हामी बसेको सहरमा यति भव्य रुपमा सम्पन्न हुन गइरहेको यस सम्मेलनमा हामीले भाग नलिए कसले लिने ? हामी सहभागी नभए को हुने ? नेपाल लगायत विश्वका विभिन्न मुलुकहरुमा बसेर पनि नेपाली भाषा एवम् सँस्कृतिको विकास र विस्तारमा योगदान पुर्याएवापत विभिन्न महिला तथा पुरुष स्रष्टाहरुलाई विदेशी भूमिमा पुरस्कृत तथा सम्मान गर्न पाउने गौरवलाई हामीले शिरोधार्य गर्नै पर्दछ ।

अयोजक संस्थाको अध्यक्ष एवम् सम्मेलन समितिको सदस्यको नाताले म अमेरिकावासी नेपाली दाजुभाइ तथा दिदीबहिनीहरुलाई यस सम्मेलनमा सक्रिय सहभागिता भई दुई दिने कार्यक्रम सफल बनाइदिनुहुन मनदेखि अनुरोध गर्दछु । पहिलो र दोस्रो दिनका दुवै कार्यक्रमहरुमा सहभागिताका लागि नेपाली दाजुभाइ–दिदीबहिनीहरुलाई चुह्लै निम्तो गरेकी छु ।

दुई दिने कार्यक्रममा उद्घाटनको पहिलो दिनमा निःशुल्क प्रवेशको व्यवस्था गरिएको छ । उक्त दिन नेपाली साहित्यमा विशिष्ट योगदान पुर्याउनुहुने महिला साहित्यकारहरुलाई सम्मानपत्र प्रदान गरिनेछ । साथै, विभिन्न स्रष्टाहरुका पुस्तक, गीति संग्रहका सिडी तथा अन्य प्रकाशनहरुको लोकार्पण हुनेछ ।

कार्यक्रमको दोस्रो दिन वृहत कविता–गोष्ठी तथा नेपाली साहित्यमा विशिष्ट योगदान गर्नुहुने महानुभावहरुलाई सम्मानपत्र दिने कार्यक्रम रहेको छ । ३५ डलर शुल्क लाग्ने यो दोस्रो दिनको कार्यक्रममा विविध साँस्कृतिक कार्यक्रमसहित रात्रीभोजको पनि व्यवस्था गरिएको जानकारी गराउँदछु ।

अन्तमा, हाम्रो भाषा र हाम्रो साहित्य हाम्रो प्राण हो, यसमा सहभागिता हाम्रो कर्तव्य हो ।

धन्यवाद ।

गीता खत्री

(अध्यक्ष)

अन्तर्राष्ट्रिय नेपाली साहित्य समाज, केन्द्रीय कमिटी ।

[भगवती बस्नेतको वाल बाट]