गरेँ आज पूजा खुसी हौ भवानी
सजाएँ नयनमा बनाएर नानी
घटस्थापना भो दशैँ घर घरैमा
रमाए युवा बृद्ध,बालक र ज्ञानी
हटोस् आपतै,बिघ्न,बाधा,बिरोध
हंसाएर हाँसुन् हराओस् थकानी
बनौं क्यै सहारा दुखेका जनैमा
हरौं कष्ट तिनको लिंदै भाव दानी
सही,सत्य हर्दम विजेता छ जानौँ
कुकर्मी र पापी हुनेछन् रछानी
नठानौं न हामी सजिब प्राण भिन्नै
सबैको बराबर छ यो जिन्दगानी
बसुन् देश बासी मिली प्रेम छर्दै
निरन्तर उदाओस् सुनौलो बिहानी
"शुभेच्छा"यही नै गरेँ भित्र बाटै
नरोओस् कहिल्यै सुकोमल सिरानी
कोमल भट्ट
पुरानो नैकाप,काठमाडौँ
(हाल:- न्युयोर्क,अमेरिका )
